काठमाडौं। नेपाली राष्ट्रिय भलिबल टोलीका कप्तान मानबहादुर श्रेष्ठले सन्न्यास लिएका छन्।
आइतबार सामाजिक सञ्जालमार्फत उनले सन्यासको घोषणा गरेका हुन्। मानबहादुरले घरेलु भलिबल त्रिभुवन आर्मी क्लबबाट खेल्दै आएका छन् ।
सामाजिक सञ्जाल भिडियो मार्फत उनले भने, ‘धेरै सोचविचार पछि मैले नेपाली राष्ट्रिय टोलीको कप्तानी त्याग्ने र अवकाश लिने निर्णय गरेको छु। यो निर्णय लिन सहज थिएन। तर, यो जिम्मेवारी नयाँ पुस्तालाई दिने समय आएको छ।”
सन् २०१५ मा राष्ट्रिय टोलीमा डेब्यु गरेका श्रेष्ठले नेपालले खेलेको पाँच वटै सेन्ट्रल जोन भलिबल र काभा नेसन्स लिग खेलेका छन्। सन् २०१७ मा माल्दिभ्समा भएको सेन्ट्रल जोनमा नेपाल तेस्रो हुँदा उनले वेस्ट आउटसाइड सेकेन्ड अट्याकरको अवार्ड जितेका थिए। उनी घरेलु प्रतियोगितामा विभागीय टोली त्रिभुवन आर्मीको कप्तानी गर्दै आएका छन्।
कर्तव्यबाट विमुख भएको नेपाल भलिबल संघले हरिहजुर थापालाई बर्खास्त गर्दै २०८० साउन २ गते मानबहादुरलाई कप्तानी जिम्मेवारी सुम्पिएको थियो।
