हुम्ला, असोज २४ — हुम्लाको चंखेली गाउँपालिका–४ देशिखोलामा आज बिहान बोलेरो जिप दुर्घटना हुँदा यात्रुहरू घाइते भएका छन्। हुम्लाको मेल्छामबाट सुर्खेततर्फ जाँदै गरेको कर्णाली प्रदेश ०२–००१ च १०९१ नम्बरको डबल क्याब जिप आज बिहान करिब ११ बजे दुर्घटना भएको हो ।दुर्घटनामा परेका घाइतेहरूलाई स्थानीयवासी र प्रहरीको सहयोगमा उद्धार गरी उपचारका लागि हेली मार्फत सुर्खेत पठाइएको छ।
स्थानीय बासिन्दाका अनुसार लगातार वर्षासँगै सडक चिप्लो हुनु र पर्याप्त मर्मत नहुँदा यस्तो दुर्घटना हुने क्रम बढेको छ। सो सडक खण्डमा सुरक्षा रेलिङ, चेतावनी साइनबोर्ड र सडकको चौडाइ अभावका कारण नियमित रूपमा साना सवारी साधनहरू जोखिममा पर्ने गरेको बताइन्छ।
विशेषगरी कर्णालीका ग्रामीण क्षेत्रमा सडक निर्माण विस्तार भए पनि गुणस्तरीय निर्माण र नियमित मर्मत अभावकै कारण दुर्घटनाको जोखिम बढ्दो क्रममा छ। स्थानीयहरूका अनुसार चालकहरूको अनुभव अभाव, बढी भारका सवारी साधन र सडकका मोडमा लापरवाही पनि दुर्घटनाका प्रमुख कारण हुन्।
प्रहरीले घटनाको अनुसन्धान जारी रहेको र हालसम्म ३ जनाको मृत्यु भइसकेको कुरा जनाएको छ।
